चितवन।देश निर्वाचनको संघारमा प्रवेश गरिरहेको वर्तमान सन्दर्भमा सञ्चारमाध्यमले अझ जिम्मेवार, संयमित र संवेदनशील भूमिका निर्वाह गर्नुपर्नेमा प्रेस काउन्सिल नेपालका बोर्ड सदस्य शान्तराम बिडारीले जोड दिनुभएको छ। नेपाल पत्रकार महासंघ चितवन शाखाले आयोजना गरेको छलफल तथा भेटघाट कार्यक्रममा बोल्दै उहाँले निर्वाचनजस्तो संवेदनशील समयमा सञ्चारमाध्यम सत्य, तथ्य र प्रमाणमा आधारित हुन नसके लोकतन्त्र नै प्रभावित हुने चेतावनी दिनुभयो।
नेपाल पत्रकार महासंघ चितवन शाखाका अध्यक्ष बसन्त राज पराजुलीको सभाध्यक्षतामा सम्पन्न कार्यक्रममा बिडारीले निर्वाचन आचारसंहिता र पत्रकार आचारसंहिताको पूर्ण पालना गर्दै व्यावसायिक पत्रकारिता गर्न आग्रह गर्नुभयो। उहाँले भन्नुभयो, “प्रेस काउन्सिल मिडियाको संरक्षक हो तर आवश्यक परेमा पीडित नागरिकको पक्षमा उभिनुपर्ने दायित्व पनि काउन्सिलकै हो।”
बिडारीले संवेदनशील समयमा भ्रामक सूचना, अफवाह र अनावश्यक प्रचारबाजी बढ्ने भएकाले यो समय सञ्चारमाध्यमका लागि कडा परीक्षा हुने उल्लेख गर्नुभयो। विशेषगरी डिजिटल मिडियामा आचारसंहिता उल्लङ्घनका घटना तुलनात्मक रूपमा बढी देखिने गरेको बताउँदै उहाँले यसप्रति थप सजग र जिम्मेवार हुन पत्रकारहरूलाई आग्रह गर्नुभयो। कुनै समस्या, दबाब वा अन्योलको अवस्था आएमा प्रेस काउन्सिलका फोकल पर्सनमार्फत जानकारी गराउन पनि उहाँले सुझाव दिनुभयो।
पत्रपत्रिका वर्गीकरणको विषयमा बोल्दै बिडारीले प्रेस काउन्सिल पत्रपत्रिका जोगाउने अभियानमै रहेको स्पष्ट पार्नुभयो। वर्गीकरण प्रक्रिया प्रभावकारी, निष्पक्ष र वस्तुगत बनाउने प्रयास निरन्तर भइरहेको उल्लेख गर्दै उहाँले नेपाल पत्रकार महासंघसँगको भेटघाट र सहकार्यलाई अझ घनिभूत बनाइने उद्घोष गर्नुभयो।
कार्यक्रममा उठेका प्रश्नहरूबारे प्रतिक्रिया दिँदै बिडारीले लोककल्याणकारी विज्ञापन, वर्गीकरण प्रक्रिया, बीमा भुक्तानी, कागजात बुझाउने झन्झट तथा विज्ञापन बोर्डको कटौतीजस्ता विषयमा छलफल र सुधार आवश्यक रहेको स्वीकार गर्नुभयो। काउन्सिल केवल छलफलमै सीमित नरही कार्यान्वयनमा केन्द्रित हुने उहाँको भनाइ थियो।
छलफलका क्रममा कोषाध्यक्ष कृष्ण आचार्यले चितवनका पत्रपत्रिकालाई दिगो र टिकाउ बनाउन प्रेस काउन्सिलले खेलेको भूमिकाको प्रशंसा गर्दै दुई वर्षअघिका कागजात पुनः बुझाउनुपर्ने झन्झटिलो प्रक्रिया समाधान गर्न आग्रह गर्नुभयो। जिल्ला हुलाक कार्यालय चितवनका नायब सुब्बा पदम श्रेष्ठले लोककल्याणकारी विज्ञापन वितरणमा दुई वर्षको ग्याप देखिएको विषय उठाउँदै चितवनमा रहेका १५ वटा पत्रपत्रिकामध्ये समयमै पत्रपत्रिका नआउँदा समस्या उत्पन्न भएको बताउनुभयो।
प्रेस चौतारी नेपाल बागमती प्रदेशका इन्चार्ज प्रतिमा सिल्वालले निर्वाचनको समयमा पत्रकारहरू लक्षित हुन सक्ने जोखिमप्रति सचेत रहन आग्रह गर्दै जिल्ला–जिल्लामा पुगेर वास्तविक अवस्था बुझ्ने प्रेस काउन्सिलको भूमिका महत्वपूर्ण रहेको धारणा राख्नुभयो।
जन अर्पण साप्ताहिकका प्रकाशक गोपाल परियारले दुर्घटना बीमाको रकम समयमै भुक्तानी नभएको गुनासो गर्दै सुभेक्षा पत्रिका बचाउने अभियानमा प्रेस काउन्सिलले खेलेको भूमिकाको खुलेर प्रशंसा गर्नुभयो। साथै, विज्ञापन बोर्डले ३ प्रतिशत रकम कटौती गरेको विषय छिटो समाधान गर्न माग गर्नुभयो।
जोश पत्रिकाका हरि प्रसाद उप्रेतीले वर्गीकरण पुनरावलोकनमा समेटिएकोमा धन्यवाद दिँदै दैनिक पत्रिका सञ्चालन कठिन भए पनि निरन्तर प्रयास जारी रहेको बताउनुभयो। चित्रवन सन्देशका सम्पादक सशिधर गैरे (सुमन) ले स्वरोजगार मिडियालाई टिकाइराख्न सबै पक्षको भूमिका आवश्यक रहेको उल्लेख गर्दै प्रेस काउन्सिलको मूल्यांकन निष्पक्ष रहेको धारणा व्यक्त गर्नुभयो।
अध्यक्ष बसन्त राज पराजुलीले चितवनका १५ वटा पत्रपत्रिका वर्गीकरण ‘क’ मा पर्नु जिल्लाका लागि सकारात्मक अवसर भएको बताउँदै गुणस्तर वृद्धिमा प्रेस काउन्सिलको मूल्यांकन सकारात्मक रहेको उल्लेख गर्नुभयो। उहाँले पत्रकारलाई केवल समाचार लेख्ने व्यक्ति मात्र नभई जिम्मेवार नागरिकको भूमिका निर्वाह गर्न पनि आग्रह गर्नुभयो। कार्यक्रमको अन्त्यमा प्रेस काउन्सिल बोर्ड सदस्य शान्तराम बिडारीले छलफलमा उठेका जिज्ञासा र सवालहरूको जवाफ दिनुभएको थियो।
प्रतिकृया दिनुहोस्