भोटेकोशी बाढीपीडितको सहयोगार्थ सल्लेरी टोलमा रक्तदान कार्यक्रम, ३४ जनाले गरे रक्तदान

---

भरतपुर/भोटेकोशीमा आएको विनाशकारी बाढी तथा विपद्बाट पीडित एवं घाइतेहरूको सहयोगार्थ शनिबार भरतपुर महानगरपालिका–११, सल्लेरी टोलमा रक्तदान कार्यक्रम सम्पन्न भएको छ । सल्लेरी टोल विकास संस्थाको आयोजनामा तथा सल्लेरी टोल आमा समूहको सह–आयोजना र नेपाल रेडक्रस सोसाइटी, प्रादेशिक रक्तसञ्चार केन्द्र भरतपुरको प्राविधिक सहयोगमा आयोजित कार्यक्रममा स्थानीय टोलवासी तथा इच्छुक रक्तदाताहरूको उत्साहजनक सहभागिता रहेको थियो ।
कार्यक्रममा ३४ जना रक्तदाताले रक्तदान गरी मानवीय सेवामा महत्वपूर्ण योगदान पुर्‍याएका छन् । विपद्को समयमा घाइते तथा बिरामीहरूको उपचारका लागि आवश्यक रगत उपलब्ध गराउने उद्देश्यले आयोजना गरिएको कार्यक्रममा रक्तदाताहरूले “रक्तदान गरौँ, जीवन बचाऔँ” भन्ने भावना आत्मसात् गर्दै सहभागिता जनाएका थिए । आयोजक सल्लेरी टोल विकास संस्थाकोतर्फबाट अध्यक्ष संजय अधिकारीले रक्तदान गर्ने सम्पूर्ण रक्तदाताहरू, सहयोगी संस्था तथा कार्यक्रम सफल बनाउन योगदान पुर्‍याउने टोलवासी लगायत सबैप्रति हार्दिक आभार व्यक्त गर्नु भयो ।