२० आश्विन २०८३, मंगलवार २१:३८
माडी/माडी नगरपालिकामा आगामी २०८३ मङ्सिर १ गतेदेखि ‘मासु जाँच ऐन २०५५’ पूर्ण रूपमा लागू गरिने भएको छ । ऐन कार्यान्वयनको तयारीस्वरूप मंगलबार नगरपालिकामा एक विशेष छलफल कार्यक्रम सम्पन्न भएको छ । माडी नगरपालिकाका मेयर तारा कुमारी काजी महतोको अध्यक्षतामा सम्पन्न उक्त कार्यक्रममा पशु सेवा कार्यालय चितवनका प्रमुख डा. प्रभात न्यौपाने प्रमुख अतिथिका रूपमा हुनुहुन्थ्यो । त्यसैगरी, माडी नगरपालिकाका प्रमुख प्रशासकीय अधिकृत जनक थापाको विशेष आतिथ्य रहेको थियो। छलफल कार्यक्रममा नगरभित्र स्वच्छ, स्वस्थ र गुणस्तरीय मासु बिक्री–वितरण सुनिश्चित गर्न विभिन्न महत्वपूर्ण निर्णयहरू गरिएका छन् । छलफलले नगरपालिकाले नगरभित्रका वधस्थलहरूको म्यापिङ गर्ने र तोकिएको मापदण्ड पुगेका वधस्थलहरूलाई अनिवार्य दर्ता भई व्यवसाय सञ्चालन गर्न अनुरोध गर्ने निर्णय गरेको छ ।
यसैगरी बजारमा मासुको गुणस्तर र सरसफाइ कायम राख्न संयुक्त अनुगमन टोली गठन गरी विभिन्न मासु पसलहरूको नियमित अनुगमन गरिने भएको छ । उक्त कार्यक्रममा पशुपन्छी तथा मत्स्य विकास शाखाका डा. नवराज चापागाईं तथा पशु सेवा कार्यालय चितवनका डा. सविना मिश्र, प्राबिधिक रामहरी शर्मा र नगरपालिकाका सूचना अधिकारी प्रविण भण्डारी लगायतको उपस्थिति रहेको थियो ।
प्रतिकृया दिनुहोस्